|
დღეს, სასტუმრო ,,რედისონ სას ივერიაში”, აშშ-ის სოფლის მეურნეობის დეპარტამენტის (USDA), საზღვარგარეთთან სოფლის მეურნეობის სერვისის (FAS) და საქართველოში აშშ-ს საელჩოს ორგანიზებით „თბილისში, ვაჭრობისა და ინვესტიციების მისიის" ფარგლებში შეხვედრები დაიწყო. სამომავლო თანამშრომლობის პერსპექტივების დასახვის მიზნით, ამერიკელ და ქართველ ბიზნესმენებს შორის შეხვედრები 3 დღეს გაგრძელდება.
მისიის ფარგლებში ორმხრივი შეხვედრა გაიმართა სოფლის მეურნეობის მინისტრ ბაკურ კვეზერელსა და აშშ-ს სოფლის მეურნეობის დეპარტამენტის წარმომადგენელს შორის.
,,აშშ-ს სოფლის მეურნეობის სახელმწიფო დეპარტამენტთან ერთად განვახორციელეთ რამოდენიმე ერთობლივი პროექტი და ჩვენი მიზანია, მომავალშიც აქტიურად ვითანამშრომლოთ ამ ორგანიზაციასთან, რადგან არსებობს ძალიან ბევრი შესაძლებლობა, რომ დავეხმაროთ ჩვენს ფერმერებს. დღეს კი, ჩვენ გვაქვს საშუალება შევხვდეთ ამერიკელ ინვესტორებს, რომლებიც დაინტერესებულები არიან საქართველოში ინვესტიციების განხორციელებით,” - განაცხადა ბაკურ კვეზერელმა.
„თბილისში, ვაჭრობისა და ინვესტიციების მისიის" უმთავრესი მიზანია, ვაჭრობისა და ინვესტიციების ხელშეწყობა, განსაკუთრებით სოფლის მეურნეობის ისეთ დარგებში, როგორიცაა მეცხოველეობა, მეფრინველეობა, მეთესლეობა, გადამამუშავებელი წარმოება და სხვა.
|
|
