|
21 ივნისს, რუსთაველის თეატრში, მეღვინეობის სფეროში ერთ-ერთი ყველაზე პრესტიჟული ღონისძიება, ვაზისა და ღვინის 33-ე მსოფლიო კონგრესი ოფიციალურად გაიხსნა. გახსნის ცერემონიას საქართველოს პრეზიდენტი მიხეილ სააკაშვილი, საქართველოს სოფლის მეურნეობის მინისტრი ბაკურ კვეზერელი, OIV-ის პრეზიდენტი ივ ბენარი, OIV-ის აღმასრულებელი დირექტორი ფედერიკო კასტელუჩი და 42 ქვეყნის 300-ზე მეტი დელეგატი ესწრებოდნენ.
კონგრესი საქართველოს პრეზიდენტმა მიხეილ სააკაშვილმა გახსნა. სიტყვით გამოსვლისას მან კონგრესის მნიშვნელობაზე ისაუბრა და აღნიშნა, რომ საქართველო იყო და არის ღვინის სამშობლო, რომელსაც უძველესი კულტურა გააჩნია.
სოფლის მეურნეობის მინისტრის, ბაკურ კვეზერელის განცხადებით, ,,ჩვენ დიდი იმედი გვაქვს, რომ ამ ღონისძიებას მოჰყვება ბევრი ტურისტი, რომელიც საქართველოს მოინახულებს სწორედ მისი უნიკალური ღვინის გასასინჯად და ღვინის დაყენების უნიკალური წესის გასაცნობად. გარდა ამისა, კონგრესი ხელს შეუწყობს ქართული ღვინის ცნობადობის გაზრდას, რაც თავისთავად აისახება გაყიდვების ზრდაზე”.
ვაზისა და ღვინის საერთაშორისო ორგანიზაციის პრეზიდენტის, ივ ბენარის განცხადებით, ,,ქართულ მეღვინეობას დიდი ტრადიციები აქვს. მე უკვე მქონდა შესაძლებლობა დამეგემოვნებინა თეთრი და შავი ღვინო და შემიძლია გითხრათ, რომ ქართულ ღვინოს აქვს იმის პოტენციალი, რათა მსოფლიო ბაზარი დაიპყროს”.
კონგრესის ფარგლებში, დელეგატები კახეთის რეგიონს მოინახულებენ, სადაც ღვინის ქარხნებს დაათვალიერებენ.
შეგახსენებთ, რომ საქართველო ვაზისა და ღვინის მსოფლიო კონგრესს მეორედ მასპინძლობს. პირველად, საქართველოში კონგრესი 1962 წელს ჩატარდა. მაშინ კონგრესს 32 ქვეყნის დელეგაცია ესწრებოდა.
|
|
